Kvitter - om språk, nynorsk og Yoshi

I det siste har eg fått (minst) to slike "gjengjeldingskommentarar" på bloggen min etter å ha kommentert andre blogginnlegg. Eg har sjølvsagt skrive relevante eller konstruktive kommentarar, men eg slit med å forstå kvifor desse bloggarane seinare har gått inn på bloggen min og kommentert "SV: Tusen takk for kommentar !" på det øvste innlegget mitt.

Det er kjekt med konstruktive og relevante kommentarar på bloggen, og eg har jo fleire gongar takka folk for gode kommentarar, men det er alltid av typen "Takk for langt og grundig attkvitter" etterfulgd av eit utdjupande svar på kommentaren, gjerne framhald av diskusjonen eg har oppmoda til i innlegget eg har skrive. Og når eg tilsvarande har skrive sidelange kommentarar til andre, har dei byrja svaret sitt med å takke for god og konstruktiv tilbakemelding.

Men kva tid vart det slik at ein kommentar har ein eigenverdi for desse fjorten år gamle jentene? Eg ser så mange som skriv "Kommenterer tilbake<3", men vil det berre seie at dei skriv "takk for kommentar" på bloggane til kvarandre? Kan ein kalle dette noko anna enn toskeskap?



Enkle sinn, enkle gleder?
Eg legg skulda på blogg.no og liknande bloggsider i utlandet sitt utstrakte arbeid med å byggje eit samfunn kring bloggane, for dette fenomenet. No startar ein ikkje lenger bloggar fordi ein har noko å blogge om, men fordi ein "må". Blogg.no og andre bloggarar krev sjølvsagt at alle som deltek i konkurransar osv. har eigen blogg. Legg dette saman med topplister for mest vitja (mest genererte reklameinntekter) og mest aktive bloggar og kva skjer då? Jo, kvar dag vil 1500 fjortisjenter opprette ein blogg utan å vite kva dei skal fylle han med.

Og når ein skriv ein meiningslaus blogg, kvifor skal då kommentarane ha nokon annan funksjon enn å lage høge, fine tal under kvart innlegg? Desse fjortisbloggarane gjev ein lang og høg blaff i om kommentarane dei får er konstruktive tilbakemeldingar eller om dei er like innhaldslause som innlegget dei står under, så lenge det står noko anna enn "ingen kommentarer" etterpå.

Men kva er eigentleg det neste? Vi har jo sett døme på at kommentarar er premie i konkurransar, at det er eit gode ein burde gjengjelde, at det har med høflegheit å skrive noko berre for å skrive noko osv., men kor lang tid skal det gå før eg finn eit blogginnlegg om at "Julie Maria har busjdag i dag jeg har gitt hun 20 komentarer <3"?

Her er slik ein ikkje gjer det, og slik ein gjer det:


Den øvste kommentaren fekk eg etter å ha skrive ein lang kommentar om mammabloggarar til eit innlegg om nettopp mammabloggarar. Den nedste kommentaren fekk eg etter å ha kommentert eit innlegg om sidemål, og kommentert blant anna at ho skreiv "sidemål" og "nynorsk" om kvarandre. Slikt er hyggeleg, men takkekommentarar er på grensa til boss.

Eyh, no kom eg på eit avløysarord for "spam", anna enn "søppelpost"! Bosspost! Bosspost kan ein jo òg bruke om meiningslause blogginnlegg og -kommentarar? Nei til bosspost!

Eg var litt lei av at bloggen såg ut som om han var retta mot 12-åringar, så eg tok nokre grep og gjorde han meir... Tjah, eg veit ikkje kva eg gjorde, men eg er litt nøgd.

Gjer meir utover dagen. Toppbiletet vert antakeleg endra litt.

Det er sjølvsagt lov å meine noko om dette, men ingen tvang. ^^

Folk uroar seg over straumprisane, nokon har ikkje råd til å varme opp huset og frys i (hjel) hel når leverandøren tek straumen. Andre tenkjer mest på rettferd og pengar, kulda er ikkje så gale. Eg fekk litt sjokk då eg såg dette på framsida av Aftenposten.

Det er ikkje beinfrossent i Hvittingfoss, kor mannen - Jon Blix - er frå, men det er minusgradar. Likevel stiller han i ei knallraud t-skjorte når Aftenposten kjem for å intervjue han. Noko spesielt.

Og eg veit vel ikkje om han er "dølakar" eller ikkje. Hvittingfoss er vel i Buskerud, om eg hugsar rett, men det ser no ut som om han bur i ein dal. Og om ikkje Østerdalen, så iallfall ein dal. ^^

I så fall gjer det ikkje meg noko, det er jo altfor få homofile her i verda. Likevel - denne konspirasjonsteorien er av dei sjukaste, men artigaste, eg har sett. På den førre Yoshi-bloggen skreiv eg om korleis logoen til spelet Super Mario Galaxy vart til "UR MR GAY" om ein berre las bokstavane med stjerne på. Sjå berre her:


I logoen til venstre kan du sjå nokre små stjernar på nokre av bokstavane, heilt i kantane. Sjå nøye. ^^

Dette vart oppdaga av forumnerdar med haukeblikk og harselert med i aust og vest lenge før spellansering. Ei amerikansk foreldregruppe krav logoen endra, men Nintendo svara nei. Punktum. Sidan då har ingenting skjedd.

No i år kjem Super Mario Galaxy 2! Og kan du gjette om logoen er endra eller ikkje?



UR STILL MR GAY!

Kva ein kan lese ut av dette, er anten at "UR STILL MR GAY", eller sidan 2-talet er med; "UR MR GAY 2" - du er òg Mr. Gay, men det er inga stjerne på 2-talet. Jaja.

Dagens ord av Aasen:
"Han lyt sjølv bidja, som inkje Tilbod fær."

Noko å tenkje på!

Lydspor: Tocotronic - K.O.O.K.
Tocotronic er eit tysk band eg tilfeldigvis kom over på Spotify. Det viste seg å vere ganske artig, tysk grumsepoprock med synth. Eg er glad i synth. ^^

Nynorksnyhende
Alle som er interesserte i å vite korleis det står til med nynorsken i landet, bør lese Nynorsk.no. Der får ein med seg så mykje flott, og litt fælt, om korleis det går med nynorsken her i landet. Av interessante nyhende dei siste dagane, kan ein jo nemne at politiet i Sogn og Fjordane bryt mållova og skriv i hovudsak på bokmål, når alt eigentleg skal vere på nynorsk - som er hovudmålet til (om lag) 90 % av befolkninga i fylket. Diverre er mållova ei pinglelov utan straffeparagraf, så Språkrådet kan ikkje krevje meir enn "skjerpings".

I samband med ulike skulerøystingar om målform er det òg oppretta Facebook-grupper for dei ulike synspunkta. Kvifor ikkje, når vi likevel går mot eit Facebook-demokrati? For øvrig er NRK ei glimrande nyhendeside. Tidlegare las eg mest på Aftenpsoten, som er ei "riksdekkjande Oslo-avis", men NRK er mykje betre. I tillegg er om lag kvar tiande artikkel på nynorsk, og bokmålet i dei andre er herleg radikalt. ^^

Yoshi-barna og My Little Pony
Eg har nettopp fått meg ny harddisk, så eg har overført ein masse bilete og slikt. No såg eg gjennom bileta frå sommarleiren til Natur og Ungdom i fjor, som var i Lofoten. Der fann eg bilete frå då nokon lånte to av Yoshi-barna som var med (ikkje døm meg for at eg tok med kosedyr på sommarleir). Eg deler dei med dykk:





Kor stor del av meg er nynorsken?
I det siste har eg opplevd at fleire, både på skulen og andre plassar, endeleg har greidd å "sjå forbi nynorsken" og vorte kjend med guten bak - Vegard. Det har vore ei positiv oppleving. Eg har det siste året opplevd at fleire vener og kjende eigentleg ikkje kjende så mange fleire sider ved meg enn Yoshi- og nynorskfanatismen. Det tykkjer eg eigentleg er litt trist. Nynorsk er jo eit skriftspråk, ikkje ein livsstil.

Eg må berre seie at sjølv om eg skriv massemassemasse om nynorsk her inne, så er nynorsk likevel ein relativt liten del av livet mitt. Sjølv om eg er aktiv i målungdomen og brukar ein del tid på å kjempe for nynorsken på fleire område, er eg så mykje, mykje meir enn nynorsk.

Så det, så
Eg tenkjer seriøst på dette med bloggroman. Det hadde vore utruleg artig, men det står og fell på at folk bidreg med påfunn og vendingar og slikt. Eg arbeider med ei rammehistorie og fyrste kapittel no, utan å kome med lovnad om kva tid vi byrjar, men det er framleis i hovudsak på idéstadiet, så emne, tid og stad er påverkelege i aller høgste grad!

... og i kveld er det...?
Finale i norske Eurovision Song Contest og fyrste delfinale i den svenske, betre kjend som Melodifestivalen! Alle som tykkjer Melodi Grand Prix er dårleg underhaldning med keisam musikk og keisame folk, burde heller sjå på Melodifestivalen. Svenskane kan dette, altså. ^^ For øvrig er det gøy at Alexander Rybak heier på Keep of Kalessin. Det gjer eg òg. ^^

Kva er dette?
Hei, eg vil gjerne bestille flyttregjering!
Antakeleg skal det stå "flytterengjøring", men kvifor sjekke to gongar at reklameoppslaget ditt er korrekt? Dette er jo relativt vanskeleg å ikkje leggje merke til, særs når det står øvst. Litt dårleg inntrykk, liksom. Telefonnummeret gjev ingen treff om du søkjer etter det, så la ver med det.

Eg la på kort tid om frå bokmål til nynorsk og har vorte eit lykkelegare menneske av det. På oppmoding frå lesar(ar) av denne o' så nynorskorienterte bloggen, har eg no laga ei spørjespalte. I utgangspunktet er denne spørjespalta for språkspørsmål osv., for sjølv om eg er uutdanna og eigentleg har særs lite eg skulle ha sagt, er det nokon der ute som har interesse av å vite kva eg meiner om både det eine og det andre som har med språk å gjere. Eg skal likevel ikkje nekte nokon å spørje om akkurat kva dei vil, men eg kan ikkje love å svare på alt som ikkje har med språk å gjere.

Alle spørsmål og alle svar vil eg skrive inn i innlegget her, og om det med tida blir ein del, skal eg setje opp ei oversiktlig liste, slik:

Spørsmål om nynorsk
- Kva er best: y eller ø? <-- Denne lenkja vil ta deg rett til spørsmålet!

// Kva er best - y eller ø?

Spørsmål: Kva er best, fyrst eller først, ynskje eller ønskje, personleg likar eg y foran, men eg fryktar det fins fleire "y-ord" (skulle ynskje me kunne ha ekte norske hermeteikn!) som ligg i klammer, kva meiner du/dere?

Svar: Eg tykkjer stort sett at y-alternativa er dei som ser mest nynorske ut og dei som ser best ut i koselege nynorsktekstar. Men i det siste har eg byrja å tvile på om eg skal ynskje eller ønskje meg noko, om eg skal skrive fyrst eller først.

Så eg har ikkje bestemt meg for kva eg skal gjere sjølv enno, men eg meiner altså at y-alternativa er mest landsmålaktig. Så om ein skriv ljos, so og liknande, ville y-alternativa sett best ut. Meiner no eg. :P

Vi kjenner jo alle orda hovudmål og sidemål, men det er ikkje ofte ein omtaler språk som "mål" no lenger, her i landet. I tillegg til målformene, har vi målføre. Dialektar, altså. Å kalle språk for mål er litt uvand, men det legg jo opp til uendelege, tørrvittige vitsar og gåtar.

(Fyrst: Ei målprøve er ei prøve av eit målføre, altså eit utdrag av nokon som snakkar dialekt! I norsktimane får vi utdelt målprøver og skal finne ut kor dialekta er frå).

Her er nokre tørrvittigheiter eg har kome opp med dei siste dagane:

Målvitsar
- Har du høyrt om dialektsbrukaren som var heilt på målstreken?
- Har du høyrt om dialekta som var heilt bak mål?
- Har du høyrt om austlendingen som normerte dialekta si så mykje at han vart mållaus?

Måluttrykk
Å kome i mål med målprøva = å finne ut kor dialekta er frå.

Målgåter
Her er nokre tørre målgåter til dykk!

Kor lang tid brukar ei dialekt på å forandre seg?
Kva kallar du ein dum dialektsbrukar?
Kva kallar du ein trost som snakkar dialekt?
Kva kjem du i når du trener dialekta di?

Eg lova både dykk og meg sjølv å teikne fleire slike, og no har eg gjort det. Utklippa er gamle, då eg ikkje har kome over så mange godbitar i det siste. Som vanleg særs frittståande tolkningar av situasjonane. ^^

Dagens kvardagsproblematikk:

Dette spørsmålet stilte jeg meg i dag tidlig da jeg skulle kaste søpla mi i en søppelkasse som ikke var der. Hvordan i all verden skal man få kastet søpla, når det ikke finnes en søppelkasse i nærheten? Er det rart det er søppel på bakken? Nei, det er faktisk ikke det.

- Jente, ukjent alder. Det er merkeleg, det der. Søplet går jo rett i bakken om ikkje søppelkassa er der for å ta imot.

Illustrasjonen:

Tusen - det er talet på kor mange gongar eg vakna i natt. Kvar einaste gong eg vakna, såg eg på dei to siste sifra på klokka og tenkte at det sto "07" foran, og i så fall kor god eller dårleg tid eg hadde. Det var ikkje så gøy, altså... Men då eg faktisk skulle opp, mange timar seinare, var det ikkje noko problem. Så.. Her sit eg.

Eg er ganske oppslukt i Kjærleikens ferjereiser. Sjølv om eg slit litt med å halde styr på namn og slikt, så er det gode og gripande historier som vert fletta saman i den boka, som eg fyrst var litt misnøgd med. Hoem skriv nemleg fleire bokmålsnære ord, som "nå" og "sette", og aller verst "Norge", men han er jo frå bokmålsdelen av Møre og Romsdal, så ein kan vel ikkje seie han er anna enn eit produkt av samfunnet kring seg.

Moralen er: Ein Yoshi er aldri dumt.


Frå spelet Chop Chop NInja, når prinsessa vert forvandla til stein. Hihi.

Eg likte dette særs godt. Faktisk. Det er søtt og upersonleg, men kvitrefuglen er heilt brun. Merkeleg, det der. Men eg likte det. Då eg teikna dette, tykte eg "Kvitter.blogg.no" var det beste bloggnamnet nokon sinne og var kjempeklar for å gjere dette til verdas (iallfall Noregs) beste blogg.

Toppbilete #2:


Og så var det dette. Dei blå strekane ytst var berre der for å skape breidde. Eg er jo så datadum at eg ikkje greidde å få toppbiletet akkurat dit eg ville i stilsettet, så då vart det til at eg teikna inn to blå strekar der eg ville ha dei. Dette toppbiletet har brune konturar, legg du merke til det? Fuglen er og skikkeleg tjukk.

Toppbilete #3:



Ja.. Speisa fargar, og kvitrefuglen er brun og har kvit mage. Eg veit ikkje kvifor. Dette må vere før eg fekk ein identitet som den kvitrefuglen. Høhø.. Eg liker romvesenfuglen med fire bein og blå vingar på ryggen. ^^

Toppbilete #4:


Same som nummer 2, berre at eg slengte på ei stor stjerne om at eg vart omtala i Sunnmørsposten. Eg er framleis stolt. ^^

Toppbilete #5:



Jaddå.. Denne perioden hadde eg dilla på awesome-smileyen. Ikkje spesielt nøgd med dei hengande bokstavane, altså. Difor vart denne bytt ut nokså raskt.

Toppbilete #6:



Dette er det eg liker best av alle, trur eg! Warhol-fugl, bokmålskråkespor, og teksten om Twitter-inspirasjon. Særs nøgd. ^^

Toppbilete #7:



Dette hadde eg inntil i dag, og eg har hatt det kjempelenge. Eg tykkjer det vart særs bra. ^^ Her fekk eg med ei form for glorifisering av fuglen, namnet på bloggen og at eg elskar nynorsk. Og er det nokon som ser ein UFO? Heilt rett. Manglar derimot kråkespor.

Toppbilete #8:



Yoshi-barna gjer sitt inntog (åfydenvartørr) på bloggen igjen, men det er framleis kvitrefuglen som køyrer. Hurra-hurra! ^^

Sånn.. No skal eg lese meir i Kjærleikens ferjereiser, av Edvard Hoem. Nyt kvelden!

KrF sin nestleiar
Inger Lise Hansen, andrenestleiar i KrF, braut sundagsfreden med nokså liberale fråsegn og idear til nye retningar for KrF. Mellom anna vil ho seie ja til borgarleg vigsel av homofile, samt ha Vinmonopol i kvar kommune (det er det nemleg ikkje i dag!). Difor har eg i dag teikna litt:

Her står altså Inger Lise Hansen ute på glattisen, med høge hælar og bambiknær, og viar to homofile som får skåle i vin, medan KrF-mørkemennene står på kyrkjetrappa og peiker stygt. Hansen har for høvet fått små horn og ein liten hale. Korkje KrF-arar, homofile, Hansen eller Bambi treng å føle seg støtt av denne teikninga.

Kva meiner eg?
Anten vil Hansen no få med seg fleire liberale KrF-arar og vri partiet litt i riktig retning i enkelte saker, elles vil det svekke partiet og skape indre splid.

Dersom dette er slutten for KrF, la oss sjå på kva godt dei har gjort for landet:
- Røykelova

... Det var vel eigentleg det.

Sjølv om Flash-programmet berre avslutta av seg sjølv i går, har eg no tilgitt det, så eg har teikna litt meir. Eg tenkte fyrst at eg skulle teikne nokre Yoshi-barn som gjer ting eg likar å gjere. Ser du kva dei gjer, alle saman?